6 fevral kuni Tashqi savdo vazirligida Rossiya Federatsiyasi qishloq xo‘jaligi vazirining o‘rinbosari S.Levin bilan uchrashuv bo‘lib o‘tdi. Bu haqda Tashqi savdo vazirligi axborot xizmati xabar bermoqda.
S.Levinning ta'kidlashicha, 2017 yilning aprelida bo‘lib o‘tgan yuqori darajadagi uchrashuvlar, O‘zbekiston Respublikasi va Rossiya Federatsiyasi o‘rtasidagi ko‘p qirrali hamkorlikni, shu jumladan, qishloq xo‘jaligi sohasidagi rivojlanishga yangi turtki berdi.
Uchrashuvda savdo-iqtisodiy hamkorlikni yanada kengaytirish masalalari, jumladan, ikki mamlakat o‘rtasida tuzilgan «Yashil koridor» doirasida Rossiya bozoriga yangi va qayta ishlangan meva-sabzavot mahsulotlarini uzoq muddatli yetkazib berish masalalari muhokama qilindi. Xususan, o‘zbek meva-sabzavot mahsulotlarini eksport qilish hajmini 2-3 barobar oshirish salohiyati ta'kidlandi.
Bundan tashqari, uchrashuv chog‘ida EKSPO-2025 xalqaro ko‘rgazmasini o‘tkazishga nomzod shahar – Yekaterinburgning taqdimoti Rossiya delegatsiyasi tomonidan o‘tkazildi.
