Turkiyada 73 kishi kuydirgiga gumon bilan shifoxonaga yotqizildi 

Turkiyaning shimolida 73 kishi kuydirgiga gumon bilan shifoxonaga yotqizildi. Bir kasallangan vafot etgan. Bu haqda Hurriyet nashri xabar berdi. 

Voqea Qora dengiz bo‘yidagi Trabzon viloyatida yuz bergan. O‘tgan haftada mahalliy xo‘jaliklardan biridagi sigirda kuydirgi aniqlangan. Mutasaddilarning ogohlantirishiga qaramay, xo‘jalik egasi molni so‘yib, go‘shtini qo‘shnilariga ulashgan.

Shifoxonaga yotqazilganlarning barchasida go‘shtni iste'mol qilgandan keyin ko‘ngil aynish va madorsizlik kuzatilgan. Uch kishida kasallik borligi tasdiqlangan.  

Viloyat ma'muriyati ushbu voqea tergov qilinayotganini ma'lum qilgan. Kasallanganlar yashaydigan aholi punktida hozircha karantin kiritilmagan.