Таҳририятимизга келиб тушган навбатдаги мурожаат юзасидан суриштирув олиб бориб, Тошкент шаҳар ҳокими Раҳмонбек Усмоновнинг қонунда назарда тутилган вазифасини лозим даражада бажармаётгани, шаҳар ҳокимига ўз вазифасини бажариш мажбуриятини юклаш ҳақидаги суд қарори эса йиллар давомида ижро этилмаётганини аниқладик.

Гап шундаки, «Республика тадбиркорликни қўллаб-қувватлаш маркази» МЧЖ ўз фаолиятини кенгайтириш мақсадида ер майдонини ажратишни сўраб, пойтахт ҳокимига ёзма мурожаат қилган. Барча мутасадди давлат органлари ва идоралари билан ер ажратиш бўйича ҳужжатлар ўрнатилган тартибда келишилган ва тегишли рухсатномалар олинган бўлишига қарамасдан, Раҳмонбек Усмонов мазкур ҳужжатларни қонунда белгиланган муддатлар ва тартибда кўриб чиқмаяпти.

Тадбиркор ўз ҳақ-ҳуқуқини ҳимоя қилишини сўраб, 2015 йилда Тошкент шаҳар Хўжалик судига мурожаат қилади. Мансабдор шахснинг ноқонуний ҳаракат (ё ҳаракатсизлиги) устидан шикоят қилган ишбилармон сўзларига қулоқ тутган судья, Тошкент шаҳар ҳокимига ер ажратиш бўйича ҳужжатларни кўриб чиқиш мажбуриятини юклайди. Аммо суднинг қарори уч йил давомида ҳам ижро этилмади.

Ваҳоланки, Ўзбекистон Республикаси Маъмурий жавобгарлик тўғрисидаги, шунингдек, Жиноят кодексида «суд қарорини ижро этишга қасддан тўсқинлик қилиш, бажармаслик» каби моддалар бўйича жавобгарлик белгиланган. Шунга қарамай, Тошкент шаҳар ҳокими Раҳмонбек Усмонов Ўзбекистон Республикаси Олий Мажлиси Сенатининг аъзоси, сенатор сифатида дахлсизлик ҳуқуқидан ҳам «оқилона» фойдаланмоқда.

Узоқ вақт давом этган сарсонгарчиликдан сўнг, Тошкент шаҳридан ер ажратиш масалалари бўйича масъул ишчи орган сифатида Тошкент шаҳар Архитектура ва қурилиш бош бошқармаси шаҳарнинг бошқа ҳудудидан ер майдони ажратиб берилишини таъкидлаган. Тадбиркорлик субъекти бошқа ер майдонига қайтадан барча рухсатнома олиш босқичларидан ўтиб, янги ҳужжатларни ўрнатилган тартибда тайёрлади. Бу сафар ҳам «ТошкентбошпланЛИТИ» ДУК, Давлат санитария ва эпидемиология маркази, Ёнғин хавфсизлиги бошқармаси, Ер ресурслари ва давлат кадастри бошқармаси ва Табиатни муҳофаза қилиш бошқармаси вакиллари ҳужжатларга ижобий баҳо берди.

Аммо, лекин, бироқ... Янги ҳужжатлар Тошкент шаҳар ҳокимиятига келиб, аввалги тарих яна қайтарилаверди. Тошкент шаҳар ҳокими имзоси билан ер ажратиш бўйича ҳужжатлар Вазирлар Маҳкамаси ҳузуридаги махсус комиссияга юборилиши белгиланган. Қонун ҳужжатларида 47 кун ичида кўриб чиқилиши сўралган ҳужжатлар уч йил давомида бир хонада қолиб кетди.

Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакили ҳам бир неча марта қонунбузилиш ҳолати юзасидан, Тошкент шаҳар ҳокимиятига тадбиркорга ер майдони ажратиш масаласини қонун ҳужжатларида белгиланган тартибда кўриб чиқиш учун ваколатли бўлган орган Вазирлар Маҳкамасига юборилишини сўраб тақдимнома киритди. Бундан ҳам наф йўқ!

Агар дўппини бир чеккага ечиб, фикр юритсак: ҳоким халқнинг, қолаверса, тадбиркорнинг асл манфаатларини рўёбга чиқаришда ҳаракатсизлик қилса, қолаверса, суднинг қарорини ижро этишнинг имкони бўлмаса, нима қилиш даркор? Шавкат Мирзиёев ҳудудларнинг биринчи раҳбарларига катта ишонч билдирди, ҳокимларни жойлардаги вакили, ўз ҳимоясида эканлигини айтди. Аммо, ўз ваколати доирасидаги ҳаракатларни ўз вақтида бажармаётган, бошқача айтганда ҳаракатсизликка йўл қўяётган ҳокимлар Президент ишончини оқлаш ҳақида ўйлаб кўраётганмикин?

Қачон давлат раҳбари ташаббус билдирган ғоялар, халқ учун хизмат қилади, тадбиркорларни қўллаб-қувватлаш ваколатли шахслар томонидан амалда ижро этилади? Бир кишининг жон куйдириши билан бутун тизим ўзгармайди, агар барча бир ёқадан бош чиқариб ишламас экан, биз кўзланган манзилга етиб боришимиз учун кўп қовун пишиғи ўтади.