Surxondaryoda ikkita yangi jome masjid foydalanishga topshirildi

16 fevral kuni Surxondaryo viloyati Oltinsoy tumanidagi masjidlar soni yana ikkitaga ko‘paydi. Oltinsoy tumanida “Ahmad Yassaviy” va “Ahatxon” nomli jome masjidlar o‘tgan muborak juma kunida o‘z ish faoliyatini boshladi. Bu haqda O‘MI matbuot xizmati xabar bermoqda.

Ushbu masjidning ochilish marosimida Surxondaryo viloyati hokimi o‘rinbosari O‘ktam Qobilov, Oltinsoy tumani hokimi Erkin Boyniyozov va Surxondaryo viloyati bosh imom-xatibi Aliakbar Sayfuddinov ishtirok etib, namozxonlarni yangi masjidlar bilan qutlashdi.

Mazkur jome masjidlar Oltinsoy tumanida istiqomat qiluvchi namozxonlar uchun juda katta tuhfa bo‘ldi, hozirda ularning quvonchi cheksiz.