AQShda bolalar sportidagi jinsiy zo‘ravonlik bo‘yicha surishtiruv boshlandi

AQSh ta'lim vaziri Betsi Devosning ma'lum qilishicha, tashkilot Michigan shtati Universiteti ma'muriyatiga nisbatan o‘z surishtiruvini boshladi. Bu yerda gimnastika bo‘yicha AQSh terma jamoasi sobiq shifokori, sportchi qizlarga jinsiy shilqimlik qilishda ayblanayotgan Larri Nassar avval ishlagan.

The Wall Street Journal ma'lumotiga ko‘ra, AQSh Ta'lim vazirligi nega universitet xodimlari zo‘ravonlik va shilqimlik haqida ilk shikoyatlar paydo bo‘lganidan so‘ng tegishli chora-tadbirlarni ko‘rmaganini aniqlash niyatida.

«Biz Michigan shtati Universiteti ma'muriyati talaba qizlarni jinsiy shilqimlikdan himoya etish bo‘yicha o‘z xatti-harakatlarini batafsil tushuntirib berishiga umid qilmoqdamiz», - deya aytib o‘tdi Devos.

Eslatib o‘tamiz, Nassar sportchi qizlarga shilqimlik qilgani uchun 125 yilga ozodlikdan mahrum etildi.