Venesuela prezidenti saylovlari boshqa sanaga ko‘chirildi

Venesuela milliy saylov kengashi rahbari Tibisay Lusena prezident saylovlari 20 mayga ko‘chirilishini e'lon qildi.

Dastlab saylovlar 22 aprelga belgilangandi, biroq keyin hukumat saylovlar kunini aniq aytmagan holda, mayning ikkinchi yarmida o‘tishini ma'lum qilgan.

“Rasman: saylovlar 20 mayda o‘tadi”, deb aytgan Lusena VTV kanali efirida.

Prezident saylovlari bilan birga shtatlar va munitsipalitetlar qonunchilik kengashlari deputatlari saylovlari bo‘lib o‘tadi.

Hozirda Venesuela prezidenti lavozimiga 6 nomzod ro‘yxatdan o‘tgan, bular – amaldagi prezident Nikolas Maduro hamda Enri Falkon, Reynaldo Kixada, Luis Ratti, Fransisko Viskonti va Xaver Bertuchchi. Tahlilchilarning fikricha, asosiy kurash Maduro va Enri Falkon o‘rtasida kechadi.