O‘zbekistonda "Ilm-fan to‘g‘risida"gi qonun loyihasi ishlab chiqildi. Mazkur hujjat Innovatsion rivojlanish vazirligi tomonidan ishlab chiqildi va muhokamalar uchun regulation.gov.uz saytida taqdim etildi.
"Ilm-fan to‘g‘risida"gi qonun loyihasining maqsadi — mamlakatdagi ijtimoiy-iqtisodiy vazifalar yechimini topish uchun ilmiy va ilmiy-texnik faoliyatni boshqarish hamda milliy iqtisodiyot raqobatbardoshligini ta'minlash.
Hozirda respublika qonunchiligida aynan ilm-fan sohasini rivojlantirishga doir yagona huquqiy hujjat yo‘q. Yangi qonun loyihasining asosiy maqsadi - ilmiy va ilmiy-texnik faoliyat sub'yektlari, davlat organlari hamda ilmiy va ilmiy-texnik mahsulotlar iste'molchilari o‘rtasidagi munosabatlarni tartibga solish.
Qonun loyihasi 8 bob va 42 moddani o‘z ichiga olgan.
Qonunning kuchga kirishi ilmiy va ilmiy-texnik sohada huquqiy maydonni shakllantirish imkonini beradi. Muhokamalar 20 martga qadar davom etadi.