Foto: Barathi TV
Hindiston markazidagi Indaur shahrida joylashgan 4 qavatli mehmonxonaning qulashi oqibatida 9 kishi halok bo‘ldi. Bu haqda Asian Age nashri xabar bermoqda.
Ma'lum qilinishicha, vayronalar ostidan 10 kishini chiqarib olishga muvaffaq bo‘lingan. Biroq ulardan 9 nafari – 2 ayol va 7 erkak shifoxonada hayotdan ko‘z yumgan, yana bir kishi og‘ir ahvolda qolmoqda. Ta'kidlanishicha, mehmonxona vayronalari ostida 50 ga yaqin odam qolgan bo‘lishi mumkin. Mehmonxonada hammasi bo‘lib 25 ta xona bo‘lgan.
Dastlabki ma'lumotlarga ko‘ra, mehmonxonaning qulashiga unga katta tezlikda kelib urilgan mashina sabab bo‘lgan. Ayni vaqtda qidiruv-qutqaruv ishlari olib borilmoqda.
