Ozarboyjon prezidenti saylovlarida Ilhom Aliyev yetakchilik qilmoqda

Ozarboyjonning amaldagi prezidenti Ilhom Aliyev muddatdan tashqari prezident saylovlarida yetakchilik qilmoqda. Bundan ELS mustaqil tadqiqot markazi tomonidan o‘tkazilgan ekzit-poll natijalari darak bermoqda.

Unga ko‘ra, Aliyevga 82,71 foiz saylovchilar ovoz bergan.

11 aprelda Ozarboyjonda muddatdan tashqari prezident saylovlari bo‘lib o‘tdi. Oliy davlat lavozimiga 8 nomzod da'vogarlik qildi. Saylov uchastkalari mahalliy vaqt bilan soat 08.00da ochilib, soat 19.00ga qadar ishlagan.

Ilhom Aliyev Ozarboyjonni 2003 yildan beri boshqarib keladi. 3 marta (2003, 2008 va 2013 yillar) prezident saylovlarida g‘olib bo‘lgan.