Isroillik harbiylar Suriyaga berilgan zarbalarni izohlashdan bosh tortdi

Isroil harbiylari Suriyadagi harbiy obektlarga tungi vaqtlar berilgan zarbalarga izoh berishdan bosh tortdi. Aynan Isroil zarbalarga aloqadorlikda gumonlanmoqda, deb xabar beradi RIA «Novosti».

«Biz izoh berishdan bosh tortamiz», - deya ma'lum qildi mamlakat qurolli kuchlari vakili.

Agentlikning Suriyadagi harbiy manbasi so‘zlariga ko‘ra, «dushman raketalari» qo‘llangan holda berilgan tungi zarbalarning asosiy maqsadi Xama va Halab shaharlari yonidagi Suriya hukumat qo‘shinlari qurol-yarog‘ ombori bo‘lgan. Hujum vaqtida Xama atrofida katta yong‘in boshlangan.

Eslatib o‘tamiz, avvalroq OAV Suriya bazalariga hujum haqida qo‘shimcha ma'lumot bergandi.