Shimoliy Koreya AQShga josuslikda gumon qilinayotgan 3 amerikalikni qaytarmoqchi

Shimoliy Koreya hukumati Kim Chen In va AQSh prezidenti Donald Trampning uchrashuvi arafasida Vashingtonga 3 nafar amerikalikni qaytarib berishga tayyorlanmoqda. Bu haqda “Ryonxap” axborot agentligi xabar bermoqda.  

Ma'lum qilinishicha, asli kelib chiqishi janubiy koreyalik bo‘lgan amerikaliklar mehnat lageridan Pxenyan chekkasidagi mehmonxonaga olib kelinganlar va ularni AQShga topshirish rejalashtirilmoqda. Bu aprel boshida, taxmin qilinishicha, AQSh davlat kotibi Mayk Pompeoning Shimoliy Koreyaga norasmiy safaridan keyin yuz bergan.    

Ta'kidlanishicha, amerikaliklar alohida-alohida, biroq yaxshi sharoitlarda saqlanmoqdalar, yaxshi boqilmoqdalar, ularga tibbiy yordam ko‘rsatilmoqda va ekskursiyalarga olib borilmoqdalar.

Hibsda ushlab turilgan amerikaliklar josuslik va “dushmanona harakatlar” sodir etish ayblovi bilan ushlanganlar.

2017 yilda Shimoliy Koreya AQShga amerikalik talaba Otto Vombiyerni qaytarib bergandi. Talaba bir yilcha koma holatida qolgach, o‘ziga kelmay vafot etgandi. U Shimoliy Koreyaga sayyoh sifatida kelgan va mehmonxona devorida osig‘liq turgan siyosiy plakatni yulib tashlamoqchi bo‘lgani uchun 15 yilga ozodlikdan mahrum etilgandi.