AQSh Davlat departamentidan ma'lum qilishlaricha, Pokiston hukumati Qo‘shma Shtatlarning Islomoboddagi elchixonasi diplomatiga mamlakatni tark etishga ruxsat bergan. U Pokiston poytaxtida o‘lim bilan yakun topgan YTHga aloqador edi, deya xabar qilmoqda RIA «Novosti».
«Shuni tasdiqlashimiz mumkinki, Islomobodda 7 aprel kuni yuz bergan fojiali avtomobil halokatiga aloqador bo‘lgan amerikalik diplomat Pokistonni tark etdi», - deya qayd etib o‘tishgan Davlat departamentidan.
Aprel oyida Geo TV telekanali Pokiston poytaxtida amerikalik harbiy attashe avtomobili ishtirokidagi YTH natijasida mototsiklchi halok bo‘lganini xabar bergandi.
Ta'kidlanishicha, harbiy attasheni diplomatik immuniteti tufayli ushlashmagan, biroq uning avtomobili xatlovga olingan.
