O‘zbekiston Respublikasi Markaziy banki boshqaruvi, Moliya vazirligi, Davlat soliq qo‘mitasining qarori bilan Xo‘jalik yurituvchi sub'yektlarning bank hisobvaraqlaridan pul mablag‘larini hisobdan chiqarish tartibi to‘g‘risidagi yo‘riqnomaga o‘zgartirishlar kiritildi.
Xo‘jalik yurituvchi sub'yektlarning bank hisobvaraqlaridan pul mablag‘larini hisobdan chiqarish tartibi to‘g‘risidagi yo‘riqnomaga kiritilayotgan o‘zgartirishlar:
Muqaddima quyidagi tahrirda bayon etiladi:
«Mazkur Yo‘riqnoma O‘zbekiston Respublikasi Fuqarolik kodeksi, O‘zbekiston Respublikasi Soliq kodeksi, O‘zbekiston Respublikasining «O‘zbekiston Respublikasining Markaziy banki to‘g‘risida»gi, «Banklar va bank faoliyati to‘g‘risida»gi va «Fuqarolarning jamg‘arib boriladigan pensiya ta'minoti to‘g‘risida»gi qonunlari, O‘zbekiston Respublikasi Prezidentining 1996 yil 9 avgustdagi PF–1504-son «Byudjyet bilan hisob-kitoblar uchun xo‘jalik yurituvchi sub'yektlarning mas'uliyatini oshirish chora-tadbirlari to‘g‘risida»gi, 1998 yil 4 fevraldagi PF–1923-son «Hisob-kitob mexanizmini takomillashtirish hamda Respublika byudjyeti va mahalliy byudjyetlarga to‘lovlar tushishini rag‘batlantirish choralari to‘g‘risida»gi va 2002 yil 30 martdagi PF–3047-son «Pul massasi o‘sishini cheklash va moliyaviy intizomiga rioya etilishi yuzasidan javobgarlikni oshirish bo‘yicha chora-tadbirlar to‘g‘risida»gi farmonlariga muvofiq xo‘jalik yurituvchi sub'yektlarning bank hisobvaraqlaridan (keyingi o‘rinlarda hisobvaraq deb yuritiladi) pul mablag‘lari ularga qo‘yilgan talablarni qondirish uchun yetarli bo‘lmaganda, mablag‘larni hisobdan chiqarish tartibini belgilaydi.».
1-bandning to‘rtinchi xatboshisi quyidagi tahrirda bayon etildi:
«byudjyet mablag‘larini oluvchilarning kreditorlik qarzlarini to‘lash uchun ularning hisobvaraqlariga mablag‘ ajratish rejalari doirasida moliya va soliq organlari tomonidan ishlab chiqilgan hamda Moliya vazirligi va Davlat soliq qo‘mitasi tomonidan qonunchilikda belgilangan tartibda tasdiqlangan sxemalarda ko‘rsatilgan hisobvaraqlarga;».
8-band quyidagi tahrirda bayon etildi:
«8. Xo‘jalik yurituvchi sub'yektlarning «20400 — Jamg‘arma depozitlar», «20600 — Muddatli depozitlar» hisobvaraqlaridagi mablag‘lar, shuningdek «22602 — Mijozlarning akkreditivlari bo‘yicha depozitlari» va «22606 — Mijozlarning import bilan bog‘liq tratta va/yoki trast hujjatlari bilan kafolatlangan akkreditivlar bo‘yicha depozitlari» hisobvaraqlaridagi mablag‘lar qoldiqlari ushbu Yo‘riqnomaning 5-bandida ko‘rsatib o‘tilgan talablarni qondirish uchun depozit va akkreditiv shartnomalarida ko‘rsatilgan muddat tugagandan keyin banklar tomonidan tegishli hisobvaraqqa kirim qilinadi.».
9-band quyidagi tahrirda bayon etildi:
«9. Asosiy hisobvaraqda unga qo‘yilgan talablarni qondirish uchun mablag‘lar yetarli bo‘lmagan holda xo‘jalik yurituvchi sub'yektlarning «20400 — Jamg‘arma depozitlar», «20600 — Muddatli depozitlar», «22602 — Mijozlarning akkreditivlari bo‘yicha depozitlari» va «22606 — Mijozlarning import bilan bog‘liq tratta va/yoki trast hujjatlari bilan kafolatlangan akkreditivlar bo‘yicha depozitlari» hisobvaraqlari bo‘yicha shartnomalar muddatini uzaytirish hamda yangi shartnomalar tuzish taqiqlanadi.».
15-band quyidagi tahrirda bayon etildi:
«15. Mutanosib taqsimlash hisobvaraqdagi mablag‘larning kun boshidagi qoldig‘idan kelib chiqqan holda amalga oshiriladi. Oyning oxirgi bank ish kunida asosiy hisobvaraqqa kelib tushgan mablag‘lar kun davomida mutanosib taqsimlanadi.
Xo‘jalik yurituvchi sub'yektning asosiy hisobvarag‘idagi mablag‘lar unga qo‘yilgan talablarni qondirish uchun yetarli bo‘lmagan holda, hisobvaraqdan pul mablag‘larini mutanosib ravishda hisobdan chiqarish mazkur Yo‘riqnomaning 2-ilovasida keltirilgan misol asosida amalga oshiriladi.
Kun davomida hisobvaraqqa kelib tushgan mablag‘lar 2-son kartotekaga yetarli bo‘lganda, 2-son kartotekadagi mavjud qarzdorlik mazkur Yo‘riqnomaning 5-bandida belgilangan tartibda to‘lab beriladi, qarzdorlik qoplangandan so‘ng, keyingi to‘lovlar ushbu Yo‘riqnomaning 2-bandida belgilangan tartibda amalga oshiriladi.».
1-ilovaning 6-10-bandlaridagi «Vazirlar Mahkamasi» degan so‘zlar «Moliya vazirligi» degan so‘zlar bilan almashtirildi.
