Qashqadaryoda keng ko‘lamli kompleks maxsus profilaktik tadbiri o‘tkazildi

Qashqadaryo viloyatining Chiroqchi tumanida ijtimoiy-siyosiy vaziyatning barqarorligi va fuqarolar xavfsizligini ta'minlash, jinoyat va huquqbuzarliklarning oldini olish maqsadida o‘tkazilishi belgilangan kompleks maxsus profilaktik tadbiri yuzasidan Yo‘l xaritasi ishlab chiqildi. Bu haqda viloyat IIB Matbuot xizmati KUN.UZ’ga xabar bermoqda. 

Mazkur tadbirda Qashqadaryo viloyati Ichki ishlar boshqarmasi, O‘zbekiston Respublikasi Davlat xavfsizlik xizmati Qashqadaryo viloyati boshqarmasi, viloyat prokraturasi va “Janubi g‘arb” taktik guruh xodimlari ishtirok etdi. Tadbirda mazkur tashkilotlardan jami 400 nafarga yaqin xodim ishtirok etdi.

Kompleks tadbir davomida Chiroqchi tumani, Qahramon qishlog‘ida yashovchi fuqaro Tajiyev Nurali Jomgirovich Chiroqchi tuman IIB boshlig‘i nomiga ariza bilan murojaat qilib, u o‘z arizasida otasidan qolgan bir dona, bir nilli, 16 kalibrli 1959 yilda ishlab chiqarilgan “IJK” rusumli ov qurolini topib olganini ma'lum qilgan.

Bundan tashqari, mazkur tumanning “Zarbdor” MFY, Ravot qishlog‘ida yashovchi 1958 yilda tug‘ilgan, ishlamaydigan, muqaddam sudlanmagan Yarmatova Musallam Bozorovnaning yashash joyi va hovlisi ko‘zdan kechirilganida tarkibida giyohvand modda bo‘lmish “Kannabis” o‘simligi yetishtirilayotgani aniqlangan.

Mazkur holat yuzasidan Yarmatova Musallam Bozorovnaga nisbatan JKning 270-moddasi 1-qismi bilan jinoyat ishi qo‘zg‘atilgan. Xuddi shu jinoyat aynan mana shu qishloqda yashovchi Saydullayev Abdiqosim Mahammadiyevich tomonidan ham amalga oshirilgan va bu fuqaroga ham JKning 270-moddasi 1-qismi bilan jinoyat ishi qo‘zg‘atilgan.

Ushbu kompleks tadbir davom etmoqda.

Sarvar Anvar o‘g‘li,
KUN.UZ muxbiri