Qozog‘iston janubida yo‘lovchi poyezdining relslardan chiqishiga yo‘llarning qiyshayishi sabab bo‘lgan bo‘lishi mumkin. Respublika Investitsiyalar va rivojlanish vazirligining Transport qo‘mitasi shu haqida xabar berdi.
Ostona-Olmaota yo‘nalishidagi poyezdning qulashi mahalliy vaqt bilan soat 13:25 da Jambul viloyatining Shu tumanida ro‘y bergan. YTH natijasida 1 o‘smir yigit halok bo‘lgan, 3 katta yoshli kishi turli jarohatlar bilan shifoxonaga joylashtirilgan. Qolgan yo‘lovchilar Shu stansiyasiga boshqa poyezdda jo‘natilgan.
"Favqulodda holat mashinist yo‘llarning qiyshayganini ko‘rib, shoshilinch to‘xtatish tugmasini bosganidan keyin ro‘y bergan", - deyiladi Transport qo‘mitasining Facebook'dagi sahifasida.
"Kazaxstan temir joly" ("Qozog‘iston temir yo‘llari") milliy kompaniyasi YTH sabablarini aniqlash uchun maxsus komissiya tuzdi.
