Ispaniyalik ixtirochi VAR tizimi uchun FIFAdan katta mablag‘ undirmoqchi

Ispaniyalik ixtirochi Fransisko Lopes hakamlarga video-yordam tizimi (VAR) tufayli FIFA bilan sudlashmoqchi.

Lopes fikriga ko‘ra, takroriy videolavhalardan foydalanish fikri aynan undan chiqqan. 1999 yili u Ispaniya ta'lim va madaniyat vazirligiga «XXI asr futboli: hakamlar uchun kelajak texnologiyalari» loyihasini taqdim qilgan. 

«Men tasavvur qilgan narsalardan hozir foydalanilmoqda. Buni 1999 yili ham amalga oshirish mumkin edi», – deb bayonot berdi Lopes.

Avvalroq, u Ispaniya qirolligi futbol federatsiyasi va FIFAga xat yo‘llab, o‘z texnologiyasidan foydalanmaslikni talab qilgan edi. Endi esa tovon puli sifatida 15 million yevro so‘ramoqda.