Bugun Toshkentning bir tumanida ikki yong‘in yuz berdi: o‘t o‘chiruvchilar 6 kishini qutqarishdi

Bugun, 19 iyul kuni soat 4:54da Toshkent shahar IIBB YoXBga Mirobod tumani, Oybek ko‘chasidagi 9 qavatli uyning birinchi qavatida joylashgan do‘konda yong‘in chiqqani haqida xabar kelib tushgan. O‘t o‘chiruvchilar voqea joyiga yetib borib, soat 5:19da olovni o‘chirgan. Baxtsiz hodisa oqibatida do‘kondagi mahsulotlar yonib ketgan. O‘t o‘chiruvchilar do‘kon ustida joylashgan xonadondan olti kishini qutqarib olib chiqqan; qurbonlar va tan jarohati olganlar yo‘q. Dastlabki taxminlarga ko‘ra, alanga eletkr simlaridagi qisqa tutashuv oqibatida kelib chiqqan.

Toshkent shahar IIBB matbuot xizmati axborotiga ko‘ra, Shu kuni ertalab tuman hududidagi Nukus ko‘chasida joylashgan «Sigma» biznes markazidagi yong‘in ro‘y bergan.

Olov soat 5:49da o‘chirilgan, hodisa oqibatida 9 qavatli binoning tashqi qoplamasi va 4-qavatdagi sog‘lomlashtirish markazi joyi zarar ko‘rgan. Hodisa sabab qurbonlar va tan jarohati olganlar yo‘q. Dastlabki taxminlarga ko‘ra, yong‘inga sog‘lomlashtirish markazining SPA-salonida elektr isitish uskunasining qarovsiz qoldirilgani sabab bo‘lgan.