Qoʻshimcha funksionallar
-
Tungi ko‘rinish
Tailand poytaxtida yong‘in: kamida 27 kishi halok bo‘ldi
Tailand poytaxti Bangkokda joylashgan mashhur pabda yuz bergan yong‘in oqibatida kamida 27 kishi halok bo‘ldi, 63 nafar jabrlanuvchi shifoxonaga yotqizildi. Ularning 22 nafari og‘ir ahvolda ekani ma’lum qilindi.
Fojia 13 iyul kuni tungi vaqtda Bangkokdagi Rong Beer Na Lat Phrao nomli pabda sodir bo‘ldi. Mahalliy hokimiyat ma’lumotlariga ko‘ra, yong‘in vaqtida binoda qancha odam bo‘lgani hozircha aniq emas.
Ijtimoiy tarmoqlarda tarqalgan videolarda odamlarning kuchli vahima ichida binoni tark etayotgani, eshiklardan esa alanga otilib chiqayotganini ko‘rish mumkin.
Hozircha yong‘inning aniq kelib chiqish sababi ma’lum emas. Pabda chiqish qilgan musiqachilardan biri sahna yaqinidagi avtomatik elektr o‘chirgichdan tutun chiqayotganini ko‘rganini aytgan. Uning so‘zlariga ko‘ra, ko‘p o‘tmay elektr ta’minoti uzilgan, shundan so‘ng kuchli portlashga o‘xshash ovoz eshitilgan va binoni qisqa vaqt ichida quyuq tutun qoplagan.
Bangkok gubernatori Chadchart Sittipuntning ta’kidlashicha, yong‘in juda tez tarqalgan va qisqa fursatda shiftgacha yetib borgan. Dastlabki ma’lumotlarga ko‘ra, qurbonlarning aksariyati yong‘in emas, balki tutundan zaharlanish oqibatida halok bo‘lgan.
Gubernatorning ma’lum qilishicha, ayrim jasadlar yong‘in chiqish eshigi oldida topilgan. Bu esa evakuatsiya yo‘li qandaydir to‘siq bilan berkitilgan bo‘lishi mumkinligini ko‘rsatmoqda. Hozirda bu holat ham tergov doirasida o‘rganilmoqda.
Ma’lumotlarga ko‘ra, Rong Beer Na Lat Phrao pabi 300 nafardan ortiq mijozni qabul qilish imkoniyatiga ega bo‘lib, binoda to‘rtta yong‘in chiqish eshigi mavjud bo‘lgan. Muassasa Bangkokning mashhur Chatuchak bozori yaqinida joylashgan va mahalliy aholi orasida ommabop dam olish maskanlaridan biri hisoblangan.
Mahalliy politsiya va qutqaruv xizmatlari yong‘in sabablarini aniqlash bo‘yicha surishtiruv ishlarini davom ettirmoqda. Mutaxassislar elektr tizimidagi nosozlik yoki yong‘in xavfsizligi talablariga rioya etilmagani kabi ehtimoliy omillarni ham tekshirmoqda.
So‘nggi yillarda dunyoning turli mamlakatlarida ko‘ngilochar maskanlarda sodir bo‘lgan yong‘inlar ko‘plab insonlar hayotiga zomin bo‘lmoqda. Mutaxassislar bunday fojialarning oldini olish uchun yong‘in xavfsizligi talablariga qat’iy amal qilish va evakuatsiya chiqish yo‘llarini doimo ochiq saqlash muhimligini ta’kidlamoqda.
