AQSh prezidenti Donald Tramp OAV qarshiligiga qaramay Rossiya rahbari Vladimir Putin bilan munosabatlari yaxshi bo‘lishiga umid bildirdi. U bu haqda o‘zining Twitter’dagi sahifasida ma'lum qildi.
«Feyk yangilik nashrlari Rossiya bilan jiddiy qarama-qarshilikni, hattoki urushgacha olib keluvchi ziddiyatni ko‘rishni judayam xohlashyapti. Ular aqlsizlarcha va kuch bilan bosim o‘tkazishmoqda va Putin bilan munosabatlarim yaxshi bo‘lishini ko‘ra olishmayapti», — deb yozdi Amerika prezidenti.
Putin va Trampning to‘liq shakldagi ilk uchrashuvi 16 iyul kuni Xelsinkida bo‘lib o‘tdi. Muzokaralar deyarli to‘rt soat davom etdi.
Amerikaliklarning bir qismi Tramp Putin bilan uchrashuv chog‘ida Rossiya va shaxsan bu davlat rahbarining AQShdagi saylovlarga aralashuvi haqida gapirmagani uchun tanqid qildi. Tramp ikki davlat o‘rtasidagi munosabatlar yomonlashuviga har ikki tomon aybdorligini bildirgandi.
Muzokaralardan keyinoq Tramp Rossiyaning 2016 yildagi Amerikadagi saylovlarga aralashuvida Putin aybdorligini aytdi.
