Isroilda timsohlar tufayli xalqaro nizo kelib chiqishidan xavotirga tushishmoqda 

Isroil hukumati timsohlar qochib ketishi ehtimoli tufayli xalqaro nizo kelib chiqishidan xavotirlanmoqda. Bu haqda Sky News xabar berdi.

Timsohlar Isroil va Iordan daryosining g‘arbiy sohili – Falastinning bir qismini ajratib turadigan Iordan daryosiga  bundan 20 yil avval keltirilgandi. Ular bu hududga sayyohlarni jalb qilishi rejalashtirilgandi, ammo isroilliklar va falastinliklar nizosi sababli bu reja amalga oshmadi.

Telekanalning xabar berishicha, timsohlar hali ham yopiq fermada yashab ko‘payib kelmoqda. Hududda tez orada minglab timsohlar paydo bo‘lishi xavfi mavjud.

«Agarda timsohlar fermadan qochib daryoga tushib ketishsa nima bo‘lishini o‘ylashni istamayman – bu xalqaro nizoga sabab bo‘ladi», — dedi Iordan daryosi vodiysi hududiy kengashi raisi David Elxayani.

Hozirda fermada tisohlarni boqish bilan bir nafar xodim shug‘ullanadi, ammo u ko‘plab timsohlarni nazorat qilish imkoniyatiga ega emas. So‘nggi bor 70ta timsoh qochib ketganida ularni tutish uchun uch kun vaqt ketgandi.