Afg‘onistonning G‘azni shahrida hukumat qo‘shinlari va “Tolibon” harakati jangarilari o‘rtasidagi to‘qnashuv natijasida xavfsizlik kuchlarining kamida 14 nafar xodimi va ikki nafar tinch aholi halok bo‘ldi, deb xabar berdi Pajvak agentligi.
Avvalroq TOLO News telekanali o‘z manbasiga tayanib, toliblar G‘azni shahriga hujum boshlashganini xabar qilgandi. Toliblarning bayonotida aytilishicha, ularning otryadlari bir necha yo‘nalishda shaharga kirishga harakat qilmoqda. Hukumat kuchlari va jangarilar o‘rtasidagi ayovsiz to‘qnashuvlar sababli Qobul-G‘azni avtomagistrali yopilgan.
Pajvak agentligining xabar berishicha, to‘qnashuvlar oqibatida 25 nafar harbiy va 15 nafar tinch aholi yaralangan.
Afg‘onistonda hukumat kuchlari va “Tolibon” jangarilari o‘rtasidagi qarama-qarshilik davom etmoqda. Shuningdek, mamlakatda “Islom davlati” terrorchi guruhining ta'siri kuchaygan.
