Jamshid Kenjayev effekti. Farg‘onadagi tungi klublar va restoranlar faoliyati cheklanadi

Joriy yilning 13 avgustidan boshlab Farg‘ona viloyati hududida spirtli ichimliklar savdosi soat 21:00dan to‘xtatiladi. Shuningdek, viloyat hududidagi umumiy ovqatlanish muassasalari, restoran, kafe, bar va tungi klublar (mehmonxonalar bundan mustasno) mahalliy vaqt bilan soat 22:30dan yopiladi. Bu haqda viloyat hokimi Shuhrat G‘aniyevning tegishli farmoyishi imzolangan.

«Kun.uz»ga ma'lum bo‘lishicha, viloyat ichki ishlar boshqarmasi, O‘zbekiston Respublikasi Milliy gvardiyasi «Sharq» taktik guruhining hududiy bo‘linmalari, Favqulodda vaziyatlar boshqarmasi, Soliq boshqarmasi va viloyat DSENM rahbarlariga 2018 yilning 13 avgustidan viloyat hududida spirtli ichimliklar sotish (tarqatish) joylarini sinchkovlik bilan o‘rganib chiqish maqsadida hamda qonuniyligini ta'minlash bo‘yicha zaruriy kompleks chora-tadbirlarni amalga oshirish, shuningdek, jamoat joylarida alkogol, tamaki mahsulotlari iste'moli taqiqlangan ogohlantiruvchi matnli belgilar mavjud joylarda spirtli ichimliklarni iste'mol qilgan shaxslarga nisbatan qonunda belgilangan tartibda choralar ko‘rish vazifalari topshirilgan.

Bosh vazir Abdulla Aripov raisligida 11 avgust kuni bo‘lib o‘tgan videoselektor yig‘ilishida aholi tinchligini ta'minlash maqsadida alkogol mahsulotlari savdosi tungi soat 21:00 gacha, umumiy ovqatlanish shoxobchalarida 22:00 gacha sotilishi masalasi ko‘rib chiqilgandi.

Shundan so‘ng Toshkent shahrida umumiy ovqatlanish maskanlari va ko‘ngilochar maskanlar tungi soat 23:00gacha o‘z ishini yakunlashi borasida tushuntirish ishlari olib borilishi boshlangandi.

Bu o‘zgarishlar 9 avgust kuni Toshkent shahridagi «Aurum 898» tungi klubida sportchi Jamshid Kenjayev o‘limi bilan yakunlangan pichoqbozlik voqeasi ortidan ro‘y bermoqda.