Qozog‘istonda TIV sobiq xodimi ushlandi. U Toshkentdagi elchixonani qurishda o‘g‘irliklarda gumonlanmoqda

Qozog‘iston Tashqi ishlar vazirligining sobiq mas'ul kotibi Anarbek Karashev pora olganlikda ayblanmoqda, huquq-tartibot idoralari xodimlari uning uyidan 1,5 million dollar topishdi. Bu ish bo‘yicha olti kishi jinoiy javobgarlikka tortildi, deya xabar beradi «Astana-TV» telekanali.

«Karashev qo‘li ostidagi xodimlardan tizimli ravishda pora olganlikda ayblanmoqda, qolganlar esa tadbirlarni tashkillashtirish bo‘yicha xizmat ko‘rsatuvchi tadbirkorlardan 28 mln tengedan ortiq miqdorda noqonuniy pul mukofotlarini olish holati yuzasidan jalb qilingan», - deya aytib o‘tdi Qozog‘iston Respublikasining Davlat xizmati va korrupsiyaga qarshi kurash agentligi raisining o‘rinbosari Oljas Bektenov. 

Tashqi siyosat idorasida Qozog‘iston Davlat xizmati va korrupsiyaga qarshi kurash agentligi raisining o‘rinbosari Oljas Bektenov va Tashqi ishlar vazirligi rahbariyati ishtirokida uchrashuv bo‘lib o‘tdi. Unda so‘zga chiqqan Bektenov, vazirlikning mansabdor shaxslariga nisbatan korruptsion jinoyatlarni sodir etganlik faktlari to‘g‘risida qator ishlar yuzasidan ba'zi tafsilotlarni ma'lum qildi.

Gumonlanuvchilar Qozog‘istonning O‘zbekistondagi elchixonasi binosini kapital ta'mirlash bo‘yicha amalga oshirilmagan ishlarga to‘lovlarni amalga oshirgani ham aniqlangan. Dastlabki ma'lumotlarga ko‘ra, bu harakatlar natijasida zarar 70 million tengeni tashkil qildi.