Diplomatiya universitetida kontrakt miqdori 100 foiz oshirildi, talabalar kamida 18 million so‘mdan ortiqroq to‘lashadi

Shu bilan birga universitetda shartnoma asosida ta'lim olishning to‘lov qiymati tegishli yo‘nalish va mutaxassislik bo‘yicha respublika ta'lim muassasalari uchun belgilanganidan 3 baravar oshishi mumkin emas.

Ya'ni, Toshkent davlat yuridik universitetida kontrakt narxi 12 million bo‘lgani holda Jahon iqtisodiyoti va diplomatiya universitetida bu miqdor 36 million so‘mdan yuqori bo‘lmasligi kerak.

«Kun.uz» ma'lumotiga ko‘ra, o‘tgan o‘quv yilida universitet talabalari 9 million so‘m atrofida kontrakt to‘lashgan.

Universitet ma'muriyati narxlarning o‘zgarishini ta'lim sifatini ko‘tarish maqsadida universitet o‘qituvchilarining maoshlari oshirilishi bilan izohlagan.

Vazirlar Mahkamasining 15 avgustdagi qarori bilan OTMlar professor-o‘qituvchilari tarkibi uch bosqichda oshirilishi ko‘zda tutilgan:

2018 yil 1 sentabrdan — o‘rtacha 25 foizga;
2019 yil 1 yanvardan — 20 foizga;
2019 yil 1 iyuldan — 25 foizga.

Masalan, fan doktori darajasiga ega professor oyligi 1 sentabrdan 3,8 mln so‘mgacha, 1 yanvardan — 4,6 mln so‘mgacha, 1 iyuldan — 5,8 mln so‘mgacha oshadi.

Professor unvoniga ega bo‘lmagan, biroq fan doktori, falsafa doktori (PhD) ilmiy darajasiga yoki xorijiy davlatlarning unga tenglashtiriladigan boshqa ilmiy darajalariga yoki dotsent ilmiy unvoniga ega bo‘lgan, professor lavozimiga bir muddatga qabul qilingan shaxslarga bazaviy lavozim maoshi quyidagi miqdorda belgilanadi:
2018 yil 1 sentabrdan boshlab —  3 130 000 so‘m;
2019 yil 1 yanvardan boshlab — 3 756 000 so‘m;
2019 yil 1 iyuldan boshlab — 4 695 000 so‘m.

Ma'lumot uchun, universitetda jami bo‘lib 1250 nafar talaba tahsil oladi. O‘qituvchilar soni esa 200 nafarga yaqin, shu tariqa har bir o‘qituvchiga o‘rtacha 7 nafardan talaba to‘g‘ri keladi.

O‘gan o‘quv yilida daromadlar miqdori 13 milliard so‘mni tashkil etgan, shundan 7,5−8 milliard so‘m mablag‘ superkontraktlar hisobiga to‘g‘ri keldi.

2018/2019 o‘quv yilida universitet xarajatlari o‘qituvchilarning oyliklari oshirilishini hisobga olganda 35 milliard so‘m bo‘lishi prognoz qilingan. Universitetga 25 milliard so‘m miqdoridagi mablag‘ kontraktlar hisobidan keladi. Yana 10 milliard so‘mni Moliya vazirligi davlat byudjyetidan ajratadi.