Rossiya elchisi AQShni Suriya bo‘yicha ogohlantirdi

Rossiyaning Vashingtondagi elchisi Anatoliy Antonov AQShni Suriyadagi «asossiz va noqonuniy» tajovuzkorlikdan ogohlantirdi. Elchining so‘zlari Rossiya diplomatik missiyasining feysbukdagi sahifasida keltirilgan.

Antonovning fikricha, Suriyadagi vaziyatning yana bir keskinlashuvi hech kimning milliy manfaatlariga mos kelmaydi.

«Bundan faqat terrorchilar foyda olishi mumkin», - deya ta'kidladi elchi.

Shuningdek, Rossiya diplomatik vakolatxonasi rahbarining umid qilishicha, Amerika tomoni uning so‘zlarini «eshitadi».

Eslatib o‘tamiz, avvalroq OAV Pentagonning Suriya bo‘yicha yangi rejalarini ma'lum qilgandi.