Gruziya AQSh Maxfiy xizmatiga rossiyalik shaxsni topshirdi. U endi 97 yilga qamalishi mumkin

Gruziya Amerika Qo‘shma Shtatlariga hukumat tomonidan hakerlikda gumonlanayotgan rossiyalik Andrey Tyurin ekstraditsiya qildi. Bu haqda AQSh Maxfiy xizmatining matbuot uchun xabarnomasida aytiladi.

«Maxfiy xizmat Federal qidiruv byurosi va AQSh prokuraturasi bilan birgalikda, keng ko‘lamli hakerlik kampaniyasi, jumladan, AQSh moliya muassasalari mijozlari ma'lumotining tarixdagi eng yirik o‘g‘irlanishiga mas'ul bo‘lgan rossiyalik haker ekstraditsiyasi haqida e'lon qiladi», - deya xabar beradi maxsus xizmat.

35 yoshli rossiyalik Gruziya politsiyachilari tomonidan AQSh murojaatiga ko‘ra qo‘lga olingandi. Unga o‘nta band bo‘yicha ayblov qo‘yish mo‘ljallanmoqda, ulardan ba'zilari unga 30 yillik qamoq jazosi berishni nazarda tutadi. Umuman olganda, u 97 yilga ozodlikdan mahrum etilishi mumkin.

Eslatib o‘tamiz, avvalroq Britaniya Rossiya razvedkasining «bemalol» harakat qilayotganidan tashvishda ekani aytilgandi.