Eron AQSh bilan kelishuv doirasida tiklanish uchun 300 milliard dollar talab qildi

Mehr agentligining hujjat mazmunidan xabardor manbalarga tayanib xabar berishicha, memorandum loyihasi 14 banddan iborat bo‘lib, Tehron va Vashington o‘rtasidagi munosabatlarni bosqichma-bosqich normallashtirishni nazarda tutadi.

Eronning asosiy talablari orasida sanksiyalar va dengiz blokadasini to‘liq bekor qilish, muzlatilgan 24 milliard dollarlik aktivlarni blokdan chiqarish, Eron va Livandagi harbiy harakatlarni to‘xtatish, Amerika qo‘shinlarini Eron yaqinidagi hududlardan olib chiqish bor.

Bitimning alohida bloki yadroviy dasturga tegishli. Eron Yadro qurolini tarqatmaslik to‘g‘risidagi shartnomaga sodiqligini tasdiqlashga va yadroviy masalalar bo‘yicha yakuniy qarorni ishlab chiqish uchun 60 kunlik muzokaralarni boshlashga tayyor. Axios ma’lumotlariga ko‘ra, muhokama qilinayotgan kelishuv doirasida Eron yadro qurolini yaratmaslik va xalqaro inspektorlar nazorati ostida uranni boyitish darajasini cheklash majburiyatini olishga ham tayyor. Nashrning ta’kidlashicha, bunday qoidalar umuman olganda AQSh talablariga mos keladi.

Memorandumga ko‘ra, yakuniy kelishuv BMT Xavfsizlik Kengashi rezolyutsiyasi bilan tasdiqlanishi kerak. Kelishuvlarning bajarilishini nazorat qilish uchun maxsus monitoring mexanizmini yaratish taklif etilmoqda. Eron Tashqi ishlar vazirligi e’lon qilingan hujjat hali yakuniy emasligini va kelishilishi kerakligini aytdi.

11 iyun kuni AQSh prezidenti Donald Tramp kelishuv yakuniy tayyorgarlik bosqichida ekanini aytgan edi. Uning so‘zlariga ko‘ra, tomonlarga faqat hujjatlarni imzolash qolgan. Eron Tashqi ishlar vazirligi rasmiy vakili Ismoil Ibrohimning aytishicha, kelishuv matni ustidagi ishlar asosiy yo‘nalishlar bo‘yicha deyarli yakunlangan.