Mehnat vazirligi majburiy mehnat uchun jarimalarni sezilarli darajada oshirishni taklif qilmoqda

Bandlik va mehnat munosabatlari vazirligi mehnatga majburlash bo‘yicha jarima miqdorini oshirishga qaratilgan hujjatni tayyorladi.

«Vazirlik mutaxassislari tomonidan O‘zbekiston Respublikasi Ma'muriy javobgarlik to‘g‘risidagi kodeksning 51-moddasi “Mehnatga ma'muriy tarzda majburlov” bo‘yicha jarima miqdorini sezilarli darajada, ya'ni birinchi qonunbuzarlik holatida eng kam oylik ish haqining 25-50 barobari va takroriy holatda eng kam oylik ish haqining 50-100 barobari miqdorida oshirishga qaratilgan  hujjat ko‘rib chiqish uchun tayyorlanmoqda», - deya xabar berishgan Bandlik va mehnat munosabatlari vazirligidan.

Hozirda ushbu modda bo‘yicha jarima miqdori EKIHning 1 barobaridan 3 barobarigacha. 

O‘zbekiston Respublikasi Bandlik va mehnat munosabatlari vazirligi paxta terimiga majburiy jalb qilish holati kuzatilganda fuqarolar vazirlikning +998712000601 raqami yoki @mehnathuquqbot telegram bot ishonch tarmoqlariga murojaat qilishlari zarurligini eslatib o‘tadi.