Xodimlarni majburiy mehnatga jalb qilgan Qarshi hokimi o‘rinbosari jazolandi

Qashqadaryo viloyati, Qarshi shahar hokimining birinchi o‘rinbosari Nurbek Turdiyev xodimlarni majburiy mehnatga jalb qilgani uchun jarimaga tortildi. Bu haqda Davlat mehnat inspeksiyasi xabar berdi.

Qayd qilinishicha, uning majburiy mehnatga yo‘l qo‘ygani tasdiqlangan va Ma’muriy javobgarlik to‘g‘risidagi kodeksning 51-moddasiga (Mehnatga ma’muriy tarzda majburlash) asosan ma’muriy jarima qo‘llangan. Xabarda jarima miqdori haqida ma’lumot berilmadi.

Shuningdek, Turdiyevning xodimlarga nisbatan haqoratli munosabatda bo‘lgani yuzasidan xatti-harakatlarini Odob-axloq komissiyasida ko‘rib chiqish uchun Qashqadaryo viloyati hokimligiga taqdimnoma kiritilgan.