09:22 / 22.11.2018
4878

Jahon bankining texnik ko‘mak guruhi O‘zbekistonga keldi

Foto: MB axborot xizmati

Jahon banki ekspertlari guruhi Markaziy bank tomonidan ishlab chiqilgan “Banklar va bank faoliyati to‘g‘risida”gi qonun loyihasini ko‘rib chiqmoqda, deb xabar berdi MB axborot xizmati.

Jadal rivojlanayotgan bozor sharoitida iqtisodiy o‘sishni ta'minlashda barqaror va samarali bank tizimining ahamiyatini inobatga olgan holda, shuningdek bank tizimining barqarorligini ta'minlashda regulyatorning o‘rni va ahamiyatini oshirishga qaratilgan umumjahon tendensiyasidan kelib chiqib “Banklar va bank faoliyati to‘g‘risida”gi qonunning yangi tahriri ishlab chiqildi.

Markaziy bankning asoslantirilgan mulohazalarini qo‘llash bo‘yicha vakolatlarini hamda riskka asoslangan nazoratni amalga oshirishda oldindan ta'sir ko‘rsatishni jamlagan qonun loyihasi banklarni prudentsial nazorat qilish usullarini takomillashtirishni ko‘zda tutadi. 

Mazkur qonun loyihasi aksiyadorlar, Kengash va Boshqaruv a'zolariga yuqori malaka va ishbilarmonlik obro‘-e'tibori talablari belgilanishi hamda bank xizmatlari ommabopligini sezilarli darajada kengaytirish, banklarga autsorsing xizmat turlaridan foydalanish huquqini taqdim etishga qaratilgan. Shu bilan birga, banklarda moliyaviy texnologiyalarni (FinTech) rivojlantirishni rag‘batlantirish va axborot xavfsizligini ta'minlashga alohida e'tibor qaratilmoqda.

Qonun loyihasi bank xizmatlarini jadal rivojlanishi uchun shart-sharoitlarni yaratish va bank tavakkalchiliklarini boshqarishni joriy qilish o‘rtasidagi muvozanatni ta'minlashga mo‘ljallangan.

Top