Vetnamda bo‘ron sababli yarim million kishi evakuatsiya qilindi

Vetnamda “Usagi” tropik bo‘roni sababli yarim million kishi evakuatsiya qilindi. Mahalliy Thanh Niên nashrining ma'lum qilishicha, bo‘ron Vetnamning eng yirik shahri hisoblangan Xoshimin shahri tomon yo‘nalmoqda.

Odamlarni evakuatsiya qilishda turli idoralarning 30 ming vakili ishtirok etgan. Umumiy ekipaji 23 ming kishini tashkil qiladigan 4 mingga yaqin baliq ovlovchi kema xavfsiz joylarga qaytmoqda.

23 noyabrda ertalab “Usagi” Vungtau shahridan 270 km uzoqlikda bo‘lgan. Undagi shamol tezligi 75 km/soatga baholangan. Prognozlarga ko‘ra, bo‘ron quruqlikka 25 noyabrga o‘tar kechasi yetib keladi.

Mamlakatning janubi, janubi-sharqi va sharqida kuchli shamol, baland to‘lqinlar va kuchli yomg‘irlar bo‘lishi kutilmoqda. Ba'zi hududlarda 500 mm gacha yomg‘ir yog‘ishi mumkin.