Namangan viloyatida bojxonachilar televizor va yondirgichlarning noqonuniy aylanmasiga chek qo‘yishdi

Namangan viloyati bojxona boshqarmasi Kontrabanda va bojxona qonunchiligi buzilishiga qarshi kurashish bo‘limi xodimlari tovar-moddiy boyliklarning noqonuniy aylanmasiga chek qo‘yishdi. Bu haqda Davlat bojxona qo‘mitasi axborot xizmati xabar bermoqda.

Viloyatning Yangiqo‘rg‘on tumani hududida o‘tkazilgan tezkor tadbir davomida fuqaro X.S hamda uning ukasi X.I boshqaruvidagi ikkita «Lasetti» rusumli avtomashinalar tezkor kuzatuvga olingan.

Ushbu avtoulovlar Namangan shahri hududida to‘xtatilib, xolislar ishtirokida ko‘zdan kechirilganida, avtomashinalar saloni va yukxonasida muqaddam qo‘shni davlatdan yurtimizga noqonuniy yo‘llar bilan olib kirilgan, xorijda ishlab chiqarilgan jami 74 mln. so‘mlik, 29 dona rangli televizor va 41 500 dona yondirgich (zajigalka) tovarlari borligi va ular savdo do‘konlariga qayta sotish maqsadida olib ketilayotgani aniqlangan.

Hozirda mazkur holat yuzasidan tekshiruv harakatlari davom ettirilmoqda.