To‘yi kuni o‘qotar quroldan jarohat olgan kuyov to‘y bazmida ishtirok etishga qaror qildi

Hindistonda to‘yi kuni o‘qqa uchragan kuyov shifoxonada 3 soat o‘tkazgach, to‘y bazmida paydo bo‘ldi. Bu haqda  Hindustan Times nashri xabar berdi. 

Voqea Nyu-Dehlida yuz bergan. To‘y shodiyonalari dastlab kuyovning uyida boshlangan, so‘ngra 25 yoshli yigit oilasi bilan to‘y bazmi o‘tishi kerak bo‘lgan joyga aravada yo‘l olgan. Unga yo‘lda qarindoshlari raqsga tushib, hamrohlik qilib borishgan. Biroq yo‘lda to‘satdan aravaga ikki erkak sakrab chiqib, kuyovga o‘q uzgan va o‘ng yelkasiga jarohat yetkazgan.

“Dastlab u nima yuz berganini anglamagan. Biroq achishish va yelkasida qonni sezgach, aravadan tushib, bu haqida qarindoshlariga xabar qilgan. Bungacha esa bosqinchilar yashirinishga ulgurishgan”, deb aytilgan politsiyada.

Kuyov shifoxonaga olib borilgan, biroq 3 soat o‘tgach to‘yxonaga borib, bazmda ishtirok etgan.

Ammo to‘y tugagach, kuyovga jarrohlik aralashuvi talab qilingani sababli, shifoxonaga qaytishiga to‘g‘ri kelgan. Politsiya ushbu suiqasd yuzasidan tergov boshlagan.