WBC boksni Olimpiada dasturida saqlab qolishga chaqirdi

Butunjahon boks kengashi (WBC) Xalqaro Olimpiya qo‘mitasiga boksning Olimpiada dasturida saqlanib qolinishi iltimosi bilan murojaat qildi.

Noyabr boshida Xalqaro havaskor bokschilar uyushmasining (AIBA) Moskvadagi kongressida O‘zbekiston vakili G‘ofur Rahimov ushbu tashkilot prezidenti lavozimiga saylangandi. AQSh moliya vazirligining xorijiy aktivlarni nazorat qilish departamenti Rahimovni sanksiyalar ro‘yxatiga kiritgani sabab, XOQ Rahimovga AIBA prezidenti lavozimiga uning nomzodi ilgari surilishi boksning Olimpiada dasturida saqlanib qolinishi masalasiga ta'sir qilishi mumkinligini ma'lum qilgan. Keyinroq XOQ AIBA kongressining qarorini bir oydan keyin ijroiya qo‘mitasi yig‘ilishida muhokama qilishi ma'lum bo‘lgandi.

“Boks Olimpiadaning asosiy turlaridan biri bo‘lgan va 1904 yildan boshlab zamonaviy Olimpiya o‘yinlari dasturida bor. Butun boks olami XOQ va AIBA boksning Olimpiada dasturida bo‘lishini xavf ostiga qo‘yayotgan zidddiyatlar bo‘yicha kelishib olishiga ishonadi. Havaskorlik boksi yosh yigitlarga o‘z orzulariga erishishlari va o‘z davlatlarini Olimpiadada taqdim qilib, shon-shuhrat qozonishlariga imkon beradi”, deb aytilgan WBC bayonotida.

Ma'lum qilinishicha, Kiyevdagi har yillik konvensiyada WBC vakillari millionlab boks ixlosmandlari boksning Olimpiya o‘yinlarida qolishi istagini bildirishgan petitsiyaga imzo qo‘yishgan.