Merkel G20’da Tramp va Si Tszinpin bilan uchrashuvlarni bekor qildi

Germaniya kansleri Angela Merkel Argentinadagi G20 sammiti doirasida AQSh prezidenti Donald Tramp va Xitoy yetakchisi Si Tszinpin bilan rejalashtirilgan uchrashuvlarni bekor qildi. Bu haqda RIA Novosti Germaniya vazirlar mahkamasiga tayangan holda xabar bermoqda.

Ta'kidlanishicha, uchrashuvlar bugun, 30 noyabr kuni bo‘lib o‘tishi kerak edi.

«Uchrashuvlar hozircha sammitga yetib kela olmagan kanslerning yo‘qligi tufayli bekor qilindi», - deya izoh berishgan matbuot xizmatidan.

Shu bilan birga, hukumat Tramp va Si Tszinpin bilan uchrashuvlar keyinroq o‘tkazilishi mumkinligini istisno qilmadi.

Eslatib o‘tamiz, avvalroq Merkelning samolyoti texnik nosozlik sababli ortga qaytarilgani, kansler G20 sammitining birinchi kunini o‘tkazib yuborishi xabar berilgandi.