Tramp JARdagi G20 sammitiga boykot bilan tahdid qilmoqda

AQSh prezidenti Donald Tramp 22–23 noyabr kuni Yoxannesburgda o‘tadigan G20 (“Katta yigirmatalik”) sammitiga mezbonlik qiladigan Janubiy Afrika Respublikasi (JAR)ga boykot bilan tahdid qildi. 8 noyabrga o‘tar kechasi u o‘zining Truth Social ijtimoiy tarmog‘idagi navbatdagi xabarida bu mamlakatni oq tanli dehqonlarni o‘ldirish va ularning yerlarini noqonuniy tortib olishda yana aybladi.

«Ushbu inson huquqlari buzilishi davom etar ekan, AQSh hukumatining biror vakili ham sammitda ishtirok etmaydi», — deb yozdi Tramp o‘z da’volariga dalil keltirmasdan. Shu bilan birga u 2025 yilgi an’anaviy G20 tadbirini o‘tkazish joyi sifatida JARni tanlashni «sharmandalik» deb atadi.

Tramp 5 sentabr kuni “Katta yigirmatalik”ning noyabr oyida JARdagi sammitida ishtirok etmasligini aytgan edi. Oq uy rahbari o‘rniga sammitga AQSh vitse-prezidenti Jyey Di Vens boradi, deb kutilgan. Biroq Trampning yangi bayonotidan Vensning Yoxannesburgga safari ham bekor qilinishi anglashiladi.

21 may kuni JAR prezidenti Siril Ramafosa Oq uyga tashrif buyurganida, Donald Tramp Janubiy Afrika Respublikasida go‘yo ommaviy ravishda oq tanli dehqonlar o‘ldirilayotganini aytdi. Dalil sifatida u bir necha suratni ko‘rsatdi. Reuters’ning keyinroq xabar berishicha, ushbu rasmlardan biri Kongo Demokratik Respublikasi (KDR)ning Goma shahrida isyonchilar bilan to‘qnashuvlardan so‘ng qutqaruvchilar jasad qoplarini ko‘tarayotgan manzarani aks ettirgan.

Oval kabinetdagi uchrashuv chog‘ida Ramafosa kam sonli oq tanli aholiga nisbatan «genotsid» ayblovlarini keskin rad etdi.

Tramp ommaviy qotillikka yana bir «dalil» sifatida qishloq yo‘li bo‘ylab qator qo‘yilgan yuzlab oq xochlar aks etgan kadrlarni keltirdi. Oq uy rahbari ularni go‘yo mingga yaqin o‘ldirilgan oq dehqonlarning qabrlari deb ta’kidladi. Aslida esa, KNA agentligi ma’lumotiga ko‘ra, bu tasvirlar 2020 yili JARning sharqiy qismdagi norozilik aksiyasiga oid edi.

Donald Trampning so‘zlariga ko‘ra, 2026 yilgi G20 sammiti dekabr oyida uning Mayamiga yaqin Doral shahrida joylashgan golf-klubi va mehmonxona-majmuasida bo‘lib o‘tadi. «Ha, u Doralda o‘tadi. Hamma aynan o‘sha yerda bo‘lishni istaydi, chunki kurort aeroportning yonida, bu eng yaxshi joy, u ajoyib», — dedi prezident sentabr boshida.

Respublikachining ta’kidlashicha, u uchrashuvni tashkil etishdan pul topmaydi. «Bu pul haqidagi kelishuv emas», — dedi u. Tramp, shuningdek, AQShdagi sammitda Rossiya prezidenti Vladimir Putin va Xitoy raisi Si Jinpingni mamnuniyat bilan qabul qilishini qo‘shimcha qildi.

Washington Post (WP) eslatganidek, Tramp o‘zining birinchi prezidentlik muddatida ham «Katta yettilik» (G7) sammitini shaxsiy golf-klubida o‘tkazishni rejalashtirgan, bu esa ko‘p tomonlama tanqidlarga sabab bo‘lgan edi.