AQSh senatining razvedka bo‘yicha qo‘mitasi uchun Qo‘shma Shtatlardagi prezidentlik saylovlariga «Rossiya aralashuvi» to‘g‘risidagi yangi hisobot tayyorlandi. Bu haqda The Washington Post xabar bermoqda.
Nashr ma'lumotlariga ko‘ra, ushbu hujjat natijalari ijtimoiy tarmoqlardagi millionlab xabarlar va postlarning «eng batafsil tahlili»ga asoslangan.
Ta'kidlanishicha, hisobotda Rossiya Donald Tramp AQSh prezidenti etib saylanishiga yordam berish maqsadida barcha asosiy ijtimoiy media-platformalardan «foydalangani» aytiladi.
Shu bilan birga, «Rossiya kampaniyasi» Trampning g‘alabasidan so‘ng ham uni qo‘llab-quvvatlash bilan shug‘ullangan.
Eslatib o‘tamiz, avvalroq Rossiya AQSh saylovlariga «aralashuv» bo‘yicha yozishmalarni e'lon qilishga tayyor ekani haqida ma'lumot bergandi.
Rossiyaning kompyuter hodisalari bo‘yicha Milliy muvofiqlashtiruv markazi direktori o‘rinbosari Nikolay Murashov ma'lum qilishicha, Rossiya tomoni AQSh roziligi bilan Rossiyaning Amerikadagi saylovlarga ehtimoliy «aralashuvi» mavzusi bo‘yicha yozishmalarni e'lon qilishga tayyor.
