Vazirlar Mahkamasi a'zolarini Oliy Majlis tomonidan tasdiqlash amaliyotini joriy qilish taklif etilmoqda

«Faol investitsiyalar va ijtimoiy rivojlanish yili» Davlat dasturi loyihasida Vazirlar Mahkamasi a'zolarini Oliy Majlis tomonidan, viloyat, tuman va shahar davlat organlari rahbarlarini tegishli xalq deputatlari Kengashlari tomonidan tasdiqlash amaliyotini joriy qilish ko‘zda tutilmoqda.

Loyihada:

Vazirlar Mahkamasining a'zolarini bosh vazir taqdimiga binoan Oliy Majlis tomonidan lavozimga tasdiqlash;

nomzodning sohani rivojlantirish bo‘yicha yaqin muddatga va uzoq istiqbolga mo‘ljallangan harakat dasturi bilan deputatlar va senatorlar oldida chiqish qilishi tartibini joriy etish;

hukumat a'zosining o‘z harakat dasturi ijrosini amalga oshirishiga doir masalalar yuzasidan axborotini Oliy Majlis, uning qo‘mitalarida muntazam eshitib borish;

viloyat, tuman va shahar davlat organlari rahbarlarini tegishli xalq deputatlari Kengashlari tomonidan tasdiqlash mexanizmini ishlab chiqish nazarda tutiladi.

«Faol investitsiyalar va ijtimoiy rivojlanish yili» Davlat dasturi loyihasi jamoatchilik muhokamalari 2019 yilning 15 yanvariga qadar o‘tkazilishi rejalashtirilgan.