19:46 / 02.02.2019
23650
ОАВ: Туркия Венесуэла олтини борасида АҚШдан огоҳлантириш олди
Фото: Reuters

Туркия ҳукумати Венесуэла билан олтин савдосини давом эттираётгани боис Вашингтондан огоҳлантириш олди, деб хабар берди Би-би-си ўз манбаларига таяниб.

Нашрнинг қайд этишича, Венесуэладан экспорт қилинаётган олтинлар охир-оқибат санкцияларни бузган ҳолда Эронда пайдо бўлиши мумкинлиги борасида АҚШнинг гумони ошиб бормоқда.

«Венесуэла ва Туркия ўртасида олтин савдоси мунтазам ўсиб бормоқда. Мамлакат ўтган йили Туркияга гўёки қайта ишлаш ва Венесуэлага қайтариш учун қарийб 900 млн долларлик олтин экспорт қилган, аммо реэкспорт ҳақида ҳеч қандай маълумот йўқ», — деб ёзади Би-би-си.

Россия ва Туркиянинг хусусий самолётлари сўнгги кунларда афтидан Каракасга парвоз қилди, деб қайд этади Би-би-си. Нашрнинг аниқлик киритишича, Каракасга охирги кунларда учиб борган самолётлардан бири президент Эрдўған билан яқин алоқада бўлган Туркиянинг Ciner group тоғ-кон компаниясига қарашли бўлган.

Венесуэла мухолифати депутати Хосе Гуэрранинг таъкидлашича, Nordwind компаниясига қарашли Россия самолёти камида 20 тонна олтинни ташиш учун Каракасга қўнган.

Мавзу
Венесуэлада сиёсий инқироз
Венесуэла президент Николас Мадурога қарши оммавий норозилик намойишлари гирдобида қолди. 23 январь куни, ушбу намойишлар авжига чиққан вақтда Венесуэла парламенти раҳбари Хуан Гуайдо ўзини мамлакатнинг муваққат президенти деб эълон қилди
Барчаси
Top