2019 yil 4 fevral kuni O‘zbekiston Respublikasi Oliy Majlisi Senati Xalqaro munosabatlar, tashqi iqtisodiy aloqalar, xorijiy investitsiyalar va turizm masalalari qo‘mitasi raisi Alisher Kurmanovning O‘zbekiston Respublikasidagi YuNeSKO vakili majburiyatlarini vaqtincha bajaruvchi Alvarez-Laso Mariya del Pilar bilan uchrashuvi bo‘lib o‘tdi.
Uchrashuvda O‘zbekiston va YuNeSKO hamkorligini yanada chuqurlashtirish masalalari muhokama etildi.
Tomonlar O‘zbekiston Respublikasi prezidentining 2018 yil oktyabrda Fransiyaga rasmiy tashrifi O‘zbekistonning YuNeSKO bilan hamkorligini rivojlantirishga yangicha turtki berganligini ta'kidladilar. Tashrif davomida imzolangan O‘zbekiston hukumati va YuNeSKO o‘rtasida Hamkorlik bo‘yicha mamlakat dasturi, shuningdek YuNeSKO bilan hamkorlikni yanada rivojlantirish bo‘yicha yo‘l xaritasi amalga oshirilmoqda.
Shu nuqtai nazardan O‘zbekistonning YuNeSKO bilan o‘zaro hamkorligi mamlakatda fan, madaniyat va ta'lim, turizmning yanada rivojlanishini qo‘llab-quvvatlash, adolat va qonuniylik hurmat qilinishini ta'minlash, shuningdek BMT Ustavida e'lon qilingan insonning asosiy huquqlari va erkinliklarini manfaatlari yo‘lida demokratik islohotlarni chuqurlashtirish mexanizmi sifatida alohida ahamiyat kasb etadi.
Uchrashuvda Qoraqalpog‘istondagi Quyi Amudaryo davlat biosfera rezervatini YuNeSKO jahon biosfera qo‘riqxonalari tarmog‘i obektlari ro‘yxatiga kiritish masalasiga e'tibor qaratildi.
Shuningdek, ikki tomonlama hamkorlikni chuqurlashtirishning aniq yo‘nalishlari bo‘yicha ham fikr almashildi.
