Kitob geoparki YuNeSKO ro‘yxatiga kirishi mumkin

Uchrashuvda O‘zbekiston tomonidan Tog‘-kon sanoati va geologiya vazirligi, Kitob geologiya qo‘riqxonasi hamda YuNeSKO huzuridagi vakolatxona vakillari ishtirok etdi. YuNeSKO tomonidan esa tegishli bo‘lim rahbarlari va mutaxassislar qatnashdi.

Muzokaralar davomida Kitob geoparkini xalqaro tarmoqqa kiritish bo‘yicha olib borilayotgan tayyorgarlik ishlarining hozirgi holati ko‘rib chiqildi. Shuningdek, mazkur maqomga erishilgan taqdirda bajarilishi lozim bo‘lgan vazifalar yuzasidan fikr almashildi.

Ta’kidlanishicha, geoparkning asosiy vazifalari sifatida barqaror turizmni rivojlantirish, hududning tabiiy va tarixiy merosini targ‘ib qilish hamda uning xalqaro nufuzini oshirish masalalariga alohida e’tibor qaratilmoqda.

O‘zbekiston vakillariga ko‘ra, Kitob geoparkini YuNeSKOning Global geoparklar tarmog‘iga kiritish orqali hududning sayyohlik salohiyatini kengaytirish, infratuzilmani rivojlantirish va uni muhim ilmiy hamda tabiiy obekt sifatida tanitish maqsad qilingan.