"Vaqf" fondi Surxondaryodagi "Obi-hayot" aksiyasi doirasida suv chiqarish ishlarini davom ettirmoqda

Aholining toza ichimlik suviga bo‘lgan ehtiyojini qondirish maqsadida, “Vaqf“ xayriya jamoat fondi tomonidan “Obi-hayot“ nomli aksiya tashkil etilib, Surxondaryo viloyatida suv chiqarish ishlari boshlab yuborilgan.

"Vaqf" xayriya jamoat fondi matbuot xizmati xabariga ko‘ra, aholini ijtimoiy qo‘llab-quvvatlash maqsadida, Surxondaryo viloyati Sariosiyo tumani "Bog‘i obod", "Sebzor" va "Ehtirom" mahallalari aholisiga fond tomonidan ko‘mak ko‘rsatilmoqda. 12 ming nafarga yaqin aholi yashovchi ushbu qishloqlarga “Vaqf” xayriya jamoat fondi tomonidan toza ichimlik suvi tarmog‘ini o‘tkazish ishlari boshlab yuborildi. Ushbu xayrli ishlarda mahalla aholisi ham faol ishtirok etmoqda.

Fond tomonidan bir kilometrlik quvurlar yetkazib berilib, qazish va montaj ishlari davom etyapti. Qishloq aholisi ko‘rsatilgan yordam uchun minnatdorlik bildirib, ularning haqlariga duoi xayrlar qilmoqdalar, deyiladi xabarda.