Xabarovskda O‘zbekiston fuqarosi vokzalni «minalashtirgani» uchun jarimaga tortildi

Xabarovskning Jyeleznodorojniy tuman sudi qarori bilan O‘zbekiston fuqarosiga hukm chiqarildi. U terrorizm akti haqida yolg‘on xabar berishda aybdor deb topildi. Bu haqda Rossiyaning Uzoq Sharq transport prokuraturasi matbuot xizmati ma'lumotlarida aytiladi.

Sudning aniqlashicha, 2018 yil 15 oktabr kuni ayblanuvchi Xabarovsk-1 temir yo‘l stansiyasi binosida bo‘lib, Xabarovsk o‘lkasi hukumatining Yagona dispetcherlik xizmati telefoni orqali portlashga tayyorgarlik ko‘rilayotgani haqida yolg‘on ma'lumot bergan.

Xabarovsk transport prokuraturasining davlat ayblovchisi pozitsiyasini hisobga olib, sud ayblanuvchi o‘z aybini to‘la tan olgani, huquqni muhofaza qilish organlariga terrorizm akti haqidagi yolg‘on xabarni tekshirish uchun ketgan xarajatlarini qoplab bergani munosabati bilan uni 20 ming rubl (300 AQSh dollari) miqdoridagi jarimaga tortdi.

Qayd etilishicha, sud hukmi qonuniy kuchga kirdi.