Afg‘onistonda bir necha yuz talabani IShID safiga jalb qilgan professor qo‘lga olindi

Kobuldagi universitetlardan birining o‘qituvchisi talabalarni IShID terrorchi guruhi safiga jalb etishda ayblanib qo‘lga olindi. Bu haqda mamlakat milliy xavfsizlik direktorati ma'lum qildi.

"Milliy xavfsizlik direktorati maxsus xizmatlari Kobulning beshinchi tumanida IShID terrorchi guruhiga jalb qilish uchun mas'ul bo‘lgan shaxsni qo‘lga olish bo‘yicha operatsiya o‘tkazdi. Shayx Muhammad Ruhoniy masjidi imomi va universitet professori Abu Abdulla Mutavakkil yoshlarni IShID safiga jalb etgan", deyiladi Afg‘oniston razvedkasining Facebook sahifasida.

Razvedka ma'lumotlariga ko‘ra, Mutavakkil Nangarhor viloyatidagi yuzlab talabalarni IShID safiga jalb etgan.

Shuningdek, professorning 16 nafar talabasi terrorchilik faoliyati uchun hibsga olingani aytilmoqda.