Tug‘ilganlikni qayd etish bo‘yicha davlat xizmatini ko‘rsatish qanday hollarda rad etiladi?

Hukumat qarori bilan Tug‘ilganlikni qayd etish bo‘yicha davlat xizmatni ko‘rsatishning ma'muriy reglamenti tasdiqlandi. Bu haqda Adliya vazirligining Telegram-kanalida xabar qilindi.

Davlat xizmati Davlat xizmatlari markazlari orqali markaz binosida joylashgan fuqarolik holati dalolatnomalarini yozish bo‘linmalari tomonidan ko‘rsatiladi.

Davlat xizmati bola tug‘ilgan joydagi yoki ota-onasidan birining doimiy yashash joyidagi Davlat xizmatlari markazida o‘zi kelgan holda amalga oshiriladi hamda markaz xodimi tomonidan elektron shaklda so‘rovnoma to‘ldiriladi.

So‘rovnomaga quyidagi hujjatlar ilova qilinishi lozim:

• tug‘ilganlik haqidagi tibbiy ma'lumotnoma;
• ota-onalarning shaxsini tasdiqlovchi hujjatlar;
• nikoh tuzilganligi haqidagi guvohnoma.

Davlat xizmati uchun eng kam oylik ish haqining 15 foizi miqdorida (30 409 so‘m) gerb yig‘imi undiriladi.

Quyidagilar davlat xizmatini ko‘rsatishni rad etish uchun asos bo‘ladi:

• so‘rovnomada noto‘g‘ri ma'lumotlar ko‘rsatilishi;
• hujjatlar to‘liq taqdim etilmaganligi;
• davlat xizmatlari ko‘rsatish uchun to‘lovni to‘lamaslik.

Markaz xodimi tomonidan hujjatlar rasmiylashtirilib 2 soatda tegishli FHDYo bo‘linmalariga taqdim etiladi.

FHDYo bo‘linmalari hujjatlarni olganidan so‘ng 2 ish kunida bolaga nisbatan tug‘ilganlik haqidagi dalolatnoma yozuvini rasmiylashtiradi hamda 1 soatda Davlat xizmatlari markaziga yuboradi.