Rossiyalik harbiylarga smartfonlarga egalik qilish va ijtimoiy tarmoqlarni yuritish taqiqlandi

Rossiya Davlat dumasi uchinchi, so‘nggi o‘qishda harbiy xizmatchilarga smartfonlarga egalik qilish va jurnalistlar bilan muloqot qilishni taqiqlovchi qonun loyihasini qabul qildi. Bu haqda parlament quyi palatasi saytida xabar berilgan.

Hujjatga ko‘ra, gap nafaqat smartfonlar, balki «Internet» axborot-telekommunikatsiya tarmog‘idan foydalangan holda audio, foto, video va geolokatsiya ma'lumotlarini tarqatish yoki taqdim etish uchun saqlanishi yoxud ishlatilishi mumkin bo‘lgan» boshqa gadjetlar haqida ketmoqda.

Harbiy xizmatchilarning ijtimoiy tarmoqlardan foydalanish huquqi cheklanmoqda. Masalan, ular o‘z joylashuvi va Qurolli kuchlarga tegishli ekanini ko‘rsatishi mumkin bo‘lgan, shuningdek, hozirgi hamda sobiq xizmatdoshlari, ular oilasi a'zolari bo‘yicha har qanday ma'lumotni internetga joylashtira olmaydi. 

Qonun loyihasi mualliflarining aytishicha, Rossiya harbiylariga «alohida davlatlar, terroristik va ekstremistik tashkilotlar» maxsus xizmatlari alohida e'tibor qaratishi taqiqni joriy etishga sabab bo‘lgan.