Kim Chen In Tramp bilan uchrashuvga jo‘nab ketdi

KXDR yetakchisi Kim Chen In Pxenyan temir yo‘l vokzalidan Xanoyga o‘z zirhli poyezdida AQSh prezidenti Donald Tramp bilan rejalashtirilayotgan uchrashuv uchun jo‘nab ketdi. Bu haqda TASS o‘z nomini oshkor qilmagan diplomatik manbaga tayangan holda xabar bermoqda.

Uning so‘zlariga ko‘ra, bu mahalliy vaqt bilan soat 17:00 (Toshkent vaqti bilan 13:00)da sodir bo‘lgan.

«Kutilishicha, KXDR yetakchisi Vetnam poytaxtigacha bo‘lgan barcha yo‘lni Xitoy orqali tranzit bilan temir yo‘ldan amalga oshiradi», - deya qo‘shimcha qilib o‘tgan agentlik suhbatdoshi.

Eslatib o‘tamiz, avvalroq AQSh prezidenti Donald Trampni Vetnamda KXDR yetakchisi Kim Chen In bilan uchrashuv vaqtida Amerika maxfiy xizmatining 200dan ortiq xodimi qo‘riqlashi xabar qilingandi.

Tramp va Kim Chen In uchrashuvi 27-28 fevral kunlari Vetnamning Xanoy shahrida bo‘lib o‘tadi.

Ta'kidlanishicha, tadbir Xanoy markazidagi hukumat mehmon uyida o‘tkazilishi kerak.