Qirg‘iziston prezidenti Sooronbay Jeenbekov respublikadagi sudyalar islohotlar o‘tkazilishiga to‘sqinlik qilishmoqda deb hisoblaydi. U Qirg‘iziston sudyalarining qurultoyida ana shunday bayonot bilan chiqdi.
"Mamlakatda jiddiy islohotlarning amalga oshirilishi sud tizimining adolatli ishlashini ta'minlashga asoslanadi. Ayrim yaxshi islohotlar sudyalarning adolatsizligi sababli to‘xtab qolgan holatlar kuzatildi", - dedi u.
Uning so‘zlariga ko‘ra, bunday vaziyatda jamoatchilik mavjud holatni o‘zgartirishni haqli ravishda talab qiladi.
"Shu bois biz qat'iy ravishda sud-huquq islohotini o‘tkazamiz", - dedi Qirg‘iziston prezidenti.
U qiyinchiliklarga qaramasdan sud islohotini "oxiriga yetkazishini" ma'lum qildi.
"Har qanday islohot qiyinchiliklar bilan bo‘ladi, biz bunday murakkab islohotni ilk bor o‘tkazmoqdamiz", - dedi u.
Avvalroq Qirg‘iziston prezidenti sudyalarga hadis aytib bergani xabar qilingandi.
