Sitsiliyada futbolchi o‘yin vaqtida vertolyot yordamida o‘g‘irlab ketildi

Sitsiliyaning havaskorlik futbol chempionatida noodatiy hodisa yuz berdi. “Viagrande” va “Nebrodi” klublari o‘rtasidagi uchrashuvning 2-bo‘limida maydonga vertolyot qo‘nib, undan boshida yopinchiqlari bo‘lgan bir necha kishi tushgan.

Kutilmagan “mehmonlar” “Viagrande”ning 55 yoshli o‘yinchisi Ignatsio Barbagalloni ushlab, uning qo‘llarini ortga qayirib, vertolyotga o‘tkazib, uchib ketishgan.

Muxlislar va futbolchilar bundan esankirab qolishgan, biroq tezda hammasi uyushtirilgani ma'lum bo‘lgan. Barbagallo faoliyatidagi oxirgi o‘yin “esda qolishi” uchun o‘zining o‘g‘irlanishini sahnalashtirgan ekan.

Ammo ushbu “sitsiliancha” hazil Barbagalloga 200 yevrolik jarima solish va 31 maygacha diskvalifikatsiya bilan yakunlandi. Bundan tashqari, butsalarini mixga bunday antiqa usulda ilib qo‘ygan futbolchiga hokimiyat tomonidan ham jazo qo‘llanishi mumkin, chunki u vertolyotning odamlar gavjum joyga qo‘nishini hokimiyat idoralari bilan kelishib olmagan.