Fransiya yana Rossiya «yashirin floti»ga mansub tankerni qo‘lga oldi

Fransiya harbiy-dengiz kuchlari Sitsiliya sohillari yaqinida xalqaro dengizchilik huquqini buzgan holda suzayotgan Deliver nomli neft tankerini qo‘lga oldi. Bu haqda Fransiya prezidenti Emmanuel Makron ma’lum qildi.

Kamerun bayrog‘i ostida suzgan ushbu kema Primorskdan Singapurga ketayotgan bo‘lgan.

Makron tanker bortiga vertolyotdan maxsus topshiriqli bo‘linma jangchilari tushirilayotgani aks etgan videoni e’lon qildi.

Makron bu «yashirin flot»ga qarshi o‘tkazilgan navbatdagi amaliyot bo‘lganini qayd etgan va bir necha kun oldin Buyuk Britaniya ham shunday amaliyot o‘tkazganini eslatgan.

«Biz yashirin flot sanksiyalarni chetlab o‘tib, Rossiya olib borayotgan urushni moliyalashtirishiga yo‘l qo‘ymaymiz. Yevropa qat’iyat ko‘rsatadi», – deya yozgan u.

2026 yil boshidan buyon Fransiya bir necha bor Rossiyaning «yashirin floti»ga mansub bo‘lgan tankerlarini to‘xtatgan. Ulardan birinchisi yanvar oyida qo‘lga olingan «Grinch» tankeri edi. Mart oyida esa «Deyna» tankeri ta’qib ostiga tushgan – faqat bir oy o‘tib unga Marsel portini tark etishga ruxsat berilgan. 1 iyun kuni Atlantika okeanida «Tagor» neft tankeri fransuz harbiylari tomonidan qo‘lga olindi. Iyun oyi o‘rtalarida Buyuk Britaniya La-Mansh bo‘g‘ozi orqali o‘tishga uringan, Rossiyaga aloqador bo‘lgan Smyrtos nomli neft tankerini qo‘lga olib, o‘z sohillariga olib ketgandi. So‘nggi xabarlarga ko‘ra, Buyuk Britaniya hukumati uning bortidagi 100 ming tonnadan ortiq neftni sotib yubormoqchi.